ʻOku ʻi ai ha pōpoaki foʻou meia Lāsolo M. Nalesoni ko ha taki fakalotu fakaemāmani lahi pea ko e palesiteni ʻo e Siasi ʻo Sīsū Kalaisi mo e Kau Māʻoniʻoni ʻi he Ngaahi ʻAho Kimui Ní, ko ha pōpoaki ʻo e ʻamanaki lelei, fakamoʻui, mo e uouangataha ke tokoni ke hiki hake kitautolu mei he mamahi ʻo e KŌVITI-19 mo fakangata ʻa e ngaahi mahaki fakaʻauha kehe hangē ko e tāufehiʻá mo e anga taʻe-fakaʻapaʻapá.
Kuo fakahoko ʻe he palōfitá ha lotu ʻo e fakafetaʻi maʻá e māmaní pea mo e tokotaha kotoa ʻoku ʻi aí. Kuo ne fakaafe‘i foki ʻa e tokotaha kotoa, ʻi he feituʻu kotoa pē, ke fakahoko ha ongo meʻa mahuʻinga ke tokoni ki hono fakamoʻui hotau ngaahi vā fetuʻutaki kuo maumaú pea mo e tukui koló:
1. Liliu hoʻo mītia fakasōsialé ko hoʻo tohinoa ʻo e loto-houngaʻiá ʻi ha ʻaho ʻe fitu
2. Fai ha lotu ‘o e fakamālō
Download ʻa e vitiō ko ʻení
ʻI heʻene fakahaaʻi ʻa ʻene loto-houngaʻia ki he kau saienisi pea mo e kau fakatotolo ʻoku nau fakatupu ha huhu maluʻi ki he KŌVITI-19, ʻoku fakamanatu mai ʻe he palōfitá (ko ha paionia ʻo e tafa mafu mo e fatafatá) “ʻoku ʻikai ha faitoʻo pe tafa te ne lava ʻo fakaleleiʻi ʻa e ngaahi palopalema fakalaumālie mo e mahamahaki ʻoku tau fehangahangai mo iá” ʻi heʻetau hoko ko ha sōsaieti fakaemāmani lahí. ‘Oku kau ai ʻa e ngaahi ʻulungaanga kovi ʻo e tāufehi‘á, moveuveú, fakamamahi ʻi he laulanú, ta‘e faitotonú, mo e anga taʻe fakaʻapaʻapá. ʻOku pehē ʻe Palesiteni Nalesoni, “Ka neongo ia, ʻoku ʻi ai ha faitoʻo—ko ha meʻa ʻe ngali fakaʻohovale—he ʻoku fehangahangai ia mo hotau natulá. Ka, ko hono ʻaongá, kuo ʻosi fakapapauʻi ia ʻe he kau saienisí kae pehē ki he kakai tangata mo fafine ʻoku tuí. Ko ʻeku ʻuhinga ʻeni ki he mālohi faifakamoʻui ʻo e loto-houngaʻiá.”
Vakai ki he GiveThanks.ChurchofJesusChrist.org ke lau mo mamata ‘i he pōpoaki fakavitiō ʻa e palōfitá ‘i ha ngaahi lea fakafonua ʻe 31. Lolotonga hoʻo ʻi aí, te ke lava foki ʻo lau ʻa e fakamatala fakataautaha ‘a Palesiteni Nalesoni ki he taimi mo e founga naʻá ne ma‘u ai ha ueʻi fakalaumālie ke fakahoko ʻa e lotu fakafetaʻi fakaemāmani lahi ko ʻení.