Teie te poro’i nō te ti’aturira’a a Russell M. Nelson, te ti’a fa’atere o te hō’ē fa’aro’o ’ati a’e i te ao nei, te peresideni ho’i nō Te ’Ēkālesia a Iesu Mesia i te Feiā Mo’a i te mau Mahana Hope’a nei, e poro’i fa’aora ’e e poro’i fa’atāhō’ē, nō te tauturu i te fa’ati’a mai ia tātou mai roto mai i te hōhonu o te COVID-19 ’e nō te fa’a’ore i te tahi atu ā mau ma’i mai te tāiroiro ’e te fa’atura ’ore.
’Ua pūpū te peropheta i te hō’ē pure ha’amāuruuru nō te ao ato’a nei ’e nō te ta’ata tāta’itahi i reira. ’Ua ani ato’a ’oia i te mau ta’ata ato’a, i te mau vāhi ato’a, ’ia rave e piti ’ohipa faufa’a rahi nō te tauturu i te fa’aora i te māuiui o tā tātou mau tā’amura’a ’āmahamaha ’e tā tātou mau huira’atira ’āmahamaha :
1. ’A fa’ariro i te rāve’a tūreiara’a sōtiare mai tā ’outou iho buka ’ā’amu ha’amāuruurura’a nō te maorora’a e hitu mahana
2. ’A parau i te hō’ē pure ha’amāuruuru
Fa’auta uira mai i teie video
’A fa’a’ite ai ’oia i tōna iho māuruuru i te mau ’aivāna’a ’e te feiā mā’imi e hāmani nei i te hō’ē pātia nō te COVID-19, ’ua fa’aha’amana’o te peropheta (e taote tāpū māfatu ’e te ’āfata ivi ’ōuma ho’i nā mua a’e) ia tātou ē « ’aita e rā’au ’e ’aita e tāpū nō te tātā’i i te mau ’ino ’e te mau ma’i pae vārua e rave rahi tā tātou e fa’aruru nei », i roto i tā tātou sōtaiete ’ati a’e i te ao nei. ’O te mau ’ino ato’a ïa mai te ’ino’ino, te ’ārepurepu, te hāmani-’ino-ra’a i te ta’ata nō te tahi atu nūna’a, te mana’o ’ino ’e te fa’atura ’ore. « Terā rā, tē vai ra te hō’ē rā’au—’o tē riro ’ei mea māere nō te mea, e mea ta’a ’ē roa te reira i tō tātou mau mana’o mātarohia », tē parau nei te peresideni Nelson. « Noa atu rā te reira, ’ua fāri’ihia tō te reira mau maita’i e te mau ’aivāna’a, nā reira ato’a e te mau tāne ’e te mau vahine nō te fa’aro’o. Tē parau nei au nō te mana fa’aora o te ’ā’au māuruuru ».
’A haere i ni’a ia GiveThanks.ChurchofJesusChrist.org nō te tai’o ’e nō te māta’ita’i i te poro’i video a te peropheta, nā roto e 31 reo. I reira, e nehenehe ato’a ’outou e tai’o i te fa’ati’ara’a a te
peresideni Nelson nō te taime ’e te huru ’oia i fāri’i na i te fa’aurura’a e pūpū i te pure ha’amāuruuru nō te ao ato’a nei.